سوالف the king

السلام عليكم ورحمة الله وبركاته

اليوم عملت هالمدونه الخاصه بي عشان ودي اكتب الماسنجر عندي فيه اثنين او ثلاثه بس من النوع الصامت وبصراحه انا افضل هالنوعيه ... اللي ما يكتبون الا لما يكون فيه شي يستاهل انه ينكتب فيه ..

بعكس بعض الناس اللي يزعجوك ازعاج غير طبيعي ما يخلوك تقرى موضوع ... او تكتب موضوع .. كل شوي طالعين لك .. يكتبون لك .... هاه وش تسوي ... والا ليه مشغول ...

شي يرفع الضغط ..

فيجبرك انك تعمله حظر ... او تقله برب طوييييييل



طيب خلونا نطلع من سالفة الماسنجر

اليوم جت سالفة الخنفشاري تدرون وش قصة الخنفشاري

احنا تستخدم هالكلمه على الشيء الجميل جمال خيالي ...

القصه

يقلكم كان فيه واحد يدعي العلم .. وكل ما سأله احد سؤال جاوب .. يعني الرجل مسوي نفسه علامه

تسأله في أي مجال يجاوب .. المهم في مجموعه شكوو فيه قالو خلونا نختبره ونشوف ان كان صادق في علمه والا يضحك علينا

اتفقو الشباب على انهم يجبو كلمه غريبه .. فكل واحد منهم قال حرف من عنده .. وجمعو الأحرف ... وطلعت معهم كلمة ... (( خنفشار ))

فسألووه قالو له ... ماهو الخنفشار ..

طبعا هو عارف كل شي ومستحيل ما يرد سؤال زي هذا

قالهم .. الخنفشار هذا نبات طيب الرائحه ينبت في اليمن ... ويعقد به الحليب ... يعني يختلط بالحليب ويصر طعم الحليب حلو

وزاد على المعلومه اثبات قال ..
وقد قال الشاعر ... عقد حبك فؤادي كما يعقد الحليب الخنفشاري .. .. << ترى ماني متأكد من بيت الشعر .. بس تقريبا كذا

وزاد عليها وقال .. وقد قال رسول الله صلى الله عليه وسلم ... ..... قالو اصحابه .. هي هي هي خلاص اسكت... كذبت علينا في سوالفك كلها ومشينها .. فلا تكذب على لسان الرسول الله عليه وسلم



هذي سالفة الخنفشاري


حياكم الله

لنا عودة لكم بسوالف أخرى ان شاء الله

هذي قصيده للشاعر عقاب الربع

عجبتني القصيده وقلت اكتب لكم مقطع منها

يا عمري والشتا ليله طويل يكدر المحزون
على شاني ولو مافيك برد ألحق تدفابي

تحرفنت العناد ولا دريت انه هو الملعون
تمدنت الغياب وصرت انا من بعدك أعرابي

تصحويت السهر ألين صرت بهالسهر مجنون
لأنه هو تهقوابي وليته ما تهقوابي

يا مسلم يا عشيري يا الحبيب القاسي المزيون
دخيلك عود لبيتن به هموم تسلابي

ادور ملح بغيابك ويرجع هالنظر مغبون
اطالع وانبهت واموت والجاني بي ثيابي

( ارتب زفرة انفاسي قهر واطلع المكنون
كأن ما بين أصباعي قسم بالله أعصابي )

اصيحك واجمعك وارتبك واتخيلك مليوون
يا غيّابي يا غيّابي يا غيّابي يا غيّابي

حرام اللي يصير إني بأرضي مغترب بالكون
اشوف الناس ماهم ناس ولا ترابي هو ترابي

ياعمري ليش تتركني على جال الأرق مركون
تخلي هالطفش يا شين بعد غيابك أولابي

وانا قلبي كما الأطفال ينسى مابه من طعون
( حسب جرحك من ألعابه ونادا عطني ألعابي )

وش رايكم تبغون تشوفون أعبط واحد في العالم

هذا هو اسمه ريمي فرنسي وان شاء الله حجيب له مقاطع من فتره لفتره

ماهو صاحي هذا العبيط

بمباراة فريقه اللي يشجعه بنهائي الدوري مدري الكاس كان لابس نفس ملابس الفريق وأول ما صفر الحككم طب من جهة الجماهير للملعب وصار يجري مع اللاعبين ورفع الكاس معهم وطلع المنصة واستلم ميدالية ذهبية وسلم على جاك شيراك وجت قناة تحسبه لاعب وسوت معه لقاء وصار يوقع للجمهور بعد المباراة .. باليوم الثاني كان في برنامج وتكلموا عنه ونزلوا له هالمقطع




غير كذا نزل بمباراة لفريق كرة طائرة وكان يقول معه النشيد الوطني هههههههههههههههه الوحيد اللي كان متحمس منهم " شين وقوي عين "

كل انسان فيه ميزه خاصه عن الباقين

تبقى هذه الميزه جميله وجذابه في هذا الشخص حتى يصيبه الغرور بها

فإذا اصابه الغرور بهذه الميزه ... ذهب جمالها وفقدت جاذبتيها

الميزه الحقيقه فيما يملكه الشخص هو حب الناس لها ...

فحافظ على حب الناس تزدات صفاتك ومميزاتك جمالا

هذا ما حدث في للفريق الأسرائيلي في اسبانيا

رغم انهم في اسبانيا لا ينتمون إلى الاسلام ولا إلى العرب

اليوم بأتكلم عن الرياضه

وبما أني نصراوي بأكتب عن المباراه الاخيره للنصر واللي هي مبارة الذهاب ضد الهلال

النصر دخل المباراه ناقص 9 لعيبه وأغلبهم اساسين منهم اللي موقوف ومنهم اللي مصاب

الاعبين الأساسين اللي غابو عن المباراه هم ... حسين عبد الغني ... السهلاوي ... أحمد الدوخي ... باسكال ... إبراهيم غالب .. خالد راضي .. حسام غالي

والاعب الثامن هو محمد عيد لعب اول مباراه له مع النصر اساسي وأصيب ..... واللاعب التاسع هو الكوري ..


طبعا دخل النصر المباراه متأثر بهذا النقص ... وكانت النتيجه ثقيله عليه في الشوط الأول ... وسجل بعدها الهلال في الشوط الثاني هدف رابع ... لكن شباب النصر ما قصرو وسجلو ثلاثة اهداف قلصة الفارق .. لتعطي الفريق الامل في التأهل للنهائي عن طريق مباراة الاياب


المشكله فين .. المشكله في غياب اللاعب حسام غالي ... طبعا تم اتهام حسام غالي من قبل لجنة المنشطات السعوديه بأن اللاعب تعاطى المنشطات ... واثبتو هذا الكلام من خلال المختبر في ماليزيا . . . لكن اللاعب كان واثق من نفسه وعارف ان هذي التهمه باطله ... وطلب تحليل العينه الثانيه من مختبر اكثر كفاءه وتمت تبرأته ..

وارسل العينه قبل مباراة الهلال والنصر بستة أيام ... ولكن اللجنه رفضت رفع الأيقاف عن اللاعب .. وبعد المباراه بست ساعات بس تم رفع الأيقاف عنه ..


طبعا .. المقصود واضح .. بما ان النصر يعاني من هذا النقص المأثر .. ولجنة المنشطات اللي طبعا ميول رئيسها هلالي وأكثر اعضاءها هدفهم ان هذا النقص يبقى كما هو .. عشان يفوز الهلال بنتيجه تاريخيه على النصر ... وكادو ان يحققو هدفهم ... لكن شباب النصر كانو في الموعد وسجلو ثلاثة أهداف .. ليتقلص الفارق


خلوني اعرفكم على نتايج هذا الفعل المشين من لجنة المنشطات اللي للأسف اعضاءها سعوديين

1- تمت شرشحة هذي اللجنه اللي للأسف بأسم السعوديه من قبل المذيعين في القنوات المصريه ... لا تقولو شي ... عندهم حق فالظلم واضح

2- تم اقفال المختبر اللي كان ضمن مختبرات الفيفا في ماليزيا

3- تم تعويض اللاعب حسام غالي بمبلغ مليون يرورو من قبل رئيس الاتحاد السعودي فيصل بن فهد .. واعتذر رئيس الاتحاد السعودي .. لرئيس الاتحاد المصري .

4- سوف يتم حل لجنة المنشطات والتحقيق معهم .


انا بصراحه اخجل من هذي اللجنه اللي فشلتنا امام العرب بسبب ميولها وعدم حياديتها شي مخجل صراحه


وللمعلوميه ترى ياسر القحطاني اخذو منه عينة عام 1428 وطلعت ايجابيه يعني انه استخدم المنشطات لكن لم يتم إيقافه



وخلونا نشوف لجنة الانضباط عاد وش بتسوي .. مع سامي الجابر بعد كلامه عن الحكم هل سيتم طرده .. وهل سيتم ايقاف الحارس العتيبي بعد تصرفاته مع الحكم .. ننتظر ونشوف


وحسام المظلوم اللي اتهموه اللجان الهلاليه ظلم لعيون لاعب واحد




لكن ان شاء الله ينتصر النصر في المباراه القادمه ويتأهل لنهائي الكأس

وان شاء الله كأس خادم الحرمين الشريفين للأبطال نصراوي ... رغم كل المحاولات لابعاد النصر عن هذه البطوله الغاليه

صبحية البرد شينه وأنت بلحالك ... كنك على كثر ناسك عايش بمنفى
بالذات لا جف دمع وسال في بالك ... والله لتبطي تبي تدفى ولا تدفى